政情：立會回收箱形同虛設
港人環保意識日漸提高，立法會議員都不時聲討政府嘅環保政策唔夠與時並進，但最近我哋聽聞立法會對推動環保都係得個講字。話說立法會新大樓各樓層都設有垃圾分類回收箱，於是喺新大樓返工嘅人，都會好自律咁將啲垃圾分類處理，之但係啲清潔工人收垃圾時，原來都係撈番埋啲垃圾一齊攞去丟，即是分類回收箱只係形同虛設，真係抵鬧。
新大樓內議員辦事處位處嘅各樓層，都設有茶水間畀議員或議員助理使用，茶水間內擺放咗三個垃圾桶，以回收廢紙、鋁罐及膠樽。有議員助理爆料話，實情佢哋丟得最多嘅垃圾就係廢紙，鋁罐或膠樽唔係咁多，但佢哋都有跟足規矩，將垃圾分類處理。話時話，佢哋多廢紙真係唔奇，事關政府每日出咁多文件，用紙量應該幾驚人，至於點解會變成廢紙，大家自己諗吓喇。
呢位議員助理仲話，佢曾經了解過，原來啲清潔工人收垃圾時，根本冇將垃圾分類處理，而係將所有垃圾倒埋一齊統一處理。更甚嘅係，立法會搬屋之前，清潔工每日收到咁多廢紙都不知幾開心，因為佢哋可以攞啲廢紙去賣，雖然錢唔多，但總算廢物利用吖，點知搬咗去添馬艦之後，附近都冇人回收廢紙，所以清潔工都費事攞啲廢紙去賣，白白浪費一個循環回收嘅機會。
等去垃圾站分類
立法會秘書處話，根據指引規定，清潔工的確要將垃圾分類處理，只係佢哋向工人了解過後發現，原來工人每日真係收到好少鋁罐同膠樽，所以工人咪用一個垃圾袋袋好晒所有垃圾，等去到垃圾站先至再分類。秘書處承認，清潔工呢個做法唔理想，所以提醒工人一定要分類處理喎。
唔怕得罪講句，立法會有咁嘅問題，位處新大樓旁邊嘅新政府總部，相信有同一問題都唔出奇，只不過所謂「門常開」嘅新政府總部戒備森嚴，將市民、請願人士等都拒諸門外，除咗喺入面返工嘅人，到底新政總裏面係點、有乜嘢地方仲未完工、又或者有冇各式各樣古怪問題，至今仍然係一個謎。