中環出更：伍穎梅蜜運衣着大變身
「九巴金公主」伍穎梅（Winnie）自從與中建企業董事許晉平拍拖之後，幾時見到佢都笑到蓮子蓉咁甜，連衣着打扮都愈見輕鬆。卓妮日前喺一個晚會見到Winnie，佢戴住一對淺色吊飾耳環，頸上披住條長長嘅彩色絲巾，將佢高挑嘅身形襯到更加搖曳生姿。Winnie笑住直認，近一、兩年心情唔同咗，連衣着品味都變埋。
Winnie話，佢以前着衫都好行政人員Look，嚴肅得來又有些少沉悶，但係近年就鍾意配搭吊墜耳環、頸巾等，一來佢着衫款式比較穩重，若果有呢啲配飾及顏色襯托吓，就可以令個人輕鬆啲、精神啲。當日佢挽住法國名牌Givenchy黑色閃爆手袋，佢話唔少朋友見到都讚不絕口喎！
與愛郎同遊迪士尼
講起同許晉平嘅戀情，Winnie就笑不攏嘴，自爆遲啲會同愛郎同遊迪士尼。原來公主好鍾意呢個童話世界，一年總會去幾次，覺得樂園畀到人夢想成真嘅希望。見佢幸福滿瀉，咁幾時派帖先？Winnie心情靚絕話：「到時一定話畀你知！」