中環出更：海洋音樂祭打響台灣月頭炮
尋日周末下午約三點半，尖沙咀文化中心鐘樓側邊嘅廣場遊客如鯽，大家不約而同被附近一個鯊魚嘴形嘅舞台深深吸引，原來由台灣光華新聞文化中心搞嘅首屆香港海洋音樂祭喺度熱爆登場，為持續一個多月嘅「台灣月」活動揭幕。喺青春奔放嘅搖滾樂聲中，維多利亞港畔增添咗唔少生氣。
光華主任張曼娟及前主任羅智成、台北經濟文化辦事處處長楊家駿夫婦都現身撐場，有份表演嘅台港歌手糖兄妹、湯姆與哈克亦齊齊現身。
音樂祭已經成為推動台灣流行音樂嘅重要力量，係勁受年輕人歡迎嘅青春慶典，今次首次搬到香港舉行，喺鐘樓側邊搭咗兩個舞台，一連兩日免費為市民及遊客提供音樂饗宴。
諗到呢條橋嘅羅智成，未見成果就已經被調返台北，尋日佢專程飛抵香港，笑稱會逗留喺廣場欣賞，直至夜晚十點散場為止。張曼娟就話，「台灣月」由呢個開心派對揭開序幕，一場場精彩節目陸續有嚟，大家要留意喇！
搞手融合台港海水
值得一提係今次海洋音樂祭搞手、台灣角頭音樂創辦人張四十三，佢個藝名咁得意，原來係為咗感謝媽媽喺四十三歲高齡生咗佢，人哋話搞文化藝術嘅人心思綿細如針，果然不假。佢仲特登喺台灣帶咗一樽海水嚟，喺開幕儀式上畀嘉賓同維港海水融合埋一齊，心思及創意冇得彈。
卓妮