中環出更：鄭志剛3.5億進軍荷里活
新世界集團主席鄭裕彤長孫鄭志剛（Adrain），一向熱愛文化藝術，呢份獨特品味同佢嘅投資動向愈來愈融為一體。由Adrain揸旗嘅新世界策略投資有限公司，最近斥資四千五百萬美元（三億五千一百萬港元）入股荷里活片商Legendary Pictures。下次《超人》、《蝙蝠俠》系列電影上映時，話唔定會見到Adrain粉墨登場宣傳添！
Legendary Pictures近排財政手緊，去年九月已經售出百分之三點三股份畀本港上市公司橙天嘉禾娛樂，籌得一億九千五百萬港元。按此推算，今次Adrain所佔股份不足百分之六，未算係大股東。Adrain接受外電訪問時證實此事，仲話製片公司同娛樂名人嘅聯繫一向緊密，入股對於新世界嘅百貨零售業務推廣好有幫助，尤其係當有品牌需要宣傳時，更加如虎添翼。
不過，Adrain坦言，呢項投資始終係盤生意，所以財務考慮要擺喺第一位喎。據悉，新世界策略投資公司，年年要投資三十億元，所以搵合適嘅投資項目都幾頭痛。講番Legendary Pictures，係一間美國獨立製片公司，過去同華納兄弟電影（Warner Bros.）合作過多部電影，除咗電影《超人》及《蝙蝠俠》系列外，仲有較近期嘅《潛行凶間》（Inception）。
將投資藝術化
Adrain擁有哈佛大學文學士學位，佢對藝術文化特別偏好不在話下，佢一手一腳湊大嘅尖沙咀K11商場，四處可見藝術品，實行將投資藝術化。咪以為佢含住金鎖匙出世，坐擁百億江山就幾世無憂，佢要證明自己能力，做得好過爺爺鄭裕彤或者爸爸鄭家純，分分鐘仲難過白手興家架！
卓妮