灰熊勝4:2寫「老八傳奇」

鄧肯麥戴斯拳怕少壯

得內線，得天下！馬刺在西岸季後賽首圈，面對灰熊嘅馬克加素及蘭度夫呢對內線組合全無制敵板斧，今場亦唔例外，蘭度夫在內線如入無人之境，全場轟入31分，創下個人季後賽新高，其中有17分在最關鍵嘅第四節奪得，成為灰熊殺入次圈嘅頭號功臣。畢竟昔日在三秒區呼風喚雨嘅鄧肯已經年屆35歲，而拍檔麥戴斯年紀仲要比佢大1歲，兩人速度慢之餘，力量亦不復當年，試問點頂得住當打嘅灰熊「孖寶」？

灰熊今季除取得球會史上首場季後賽勝仗外，亦成為NBA史上以8號種子身份淘汰一哥嘅第四支球隊！教練賀連斯賽後表示：「如果出局嘅話，根本就冇人會關心，因為你只係一支被首號種子淘汰嘅球隊，但我們如今已得到注視了！」蘭度夫就話：「唔單只球隊，我相信整個城市都會興奮起來。」

至於輸波嘅馬刺主將柏加則黯然承認：「只要季後賽失準嘅話，無論你在常規賽表現多好都徒然。」

馬刺提早出局，鄧肯頭耷耷離場。 （美聯社圖片）

馬刺（黑衫）成「老八傳奇」第四個犧牲者！ （美聯社圖片）

灰熊次圈周一凌晨鬥雷霆

近十二年間四奪總冠軍嘅馬刺落得首圈出局命運，相信呢支「老人兵團」都係時候換血求變。事實上，馬刺今季嘅正選陣容中，平均年齡高達32.4歲，就算最後生嘅柏加都28歲。反觀灰熊全軍只得後備兵柏堤亞係「三字頭」，相比起馬刺可謂前途無限。灰熊贏波後，周一凌晨就要作客雷霆打次圈首戰。