政情：張文舉家赴英捧曼聯
立法會三讀通過財政預算案後，政府過咗海就係神仙，對於泛民主派要求制訂嘅三大長遠措施，真係話之你。不過，民主黨張文光喺表決後竟然笑到見牙唔見眼，唔通佢畀政府收買咗？非也，原來佢呢個曼聯超級粉絲，買咗機票復活節去英國睇英超，仲要連睇兩場，順便陪囡囡一齊家庭樂，難怪張文諗起都咪咪嘴笑啦！
張文早前因為支聯會前主席司徒華病逝，農曆新年擱置咗外遊大計，最近心情逐漸平復，加上曼聯捷報頻傳，挑動咗佢嘅旅遊神經，咁啱囡囡又有假，一於飛去英國玩十幾日，順便睇埋波。張文話，買咗廿三日號曼聯主場對愛華頓外，仲撲緊五月一日曼聯作客阿仙奴，實行叉足電先至返港繼續立法會嘅漫長會議。
臨急臨忙先嚟買飛，驚唔驚買貴飛先？張文聞言十分老定，皆因佢哋一家三口都係曼聯球迷會會員，所以有窿路撲飛，唔使捱「黃牛飛」都有得睇。