政情：施榮懷呻棉花變「白金」
中華廠商會近年對本港廠商照顧周到，除咗大搞工展會外，去年開始仲搞埋香港食品嘉年華，第二屆將於本周四喺旺角花墟公園開鑼。通脹殺到埋身，升斗市民無乜招架能力，廠商會副會長施榮懷都要諗計抗通脹，除咗喺嘉年華推出廿幾種商品做一蚊優惠益街坊外，亦要為自己家族嘅棉紡生意解決棉花價格上漲問題，所以近期忙到飛起。
講起通脹，施榮懷感觸良多。話說佢家族喺江西設有全省最大嘅棉紡廠，專做棉花買賣及生產棉紗，屬於紡織業嘅上游工業，但去年全球棉花價格飆升二倍幾，佢坦言入行咁耐都未見過咁瘋狂嘅升勢。施榮懷話，過往一向從印度及美國入貨，但印度為咗自保，已暫停棉花出口幾個月，令佢焗住暫時要轉為採購澳洲貨應急。
施榮懷又話，內地盛產棉花嘅新疆，身價一樣水漲船高，業內人士甚至戲稱棉花係「白金」，有錢都未必買到，加上去年內地棉花收成減少咗百分之八至十，長遠都唔知點算好喎。