政情：劉健儀夢中回憶立會
立法會如無意外最快暑假就會搬去添馬艦，告別昃臣道嘅百年建築。搬屋在即，做咗廿三年立法會議員嘅內務委員會主席劉健儀（Miriam）就對現時大樓依依不捨，尋日佢仲喺電台節目自爆，話最唔捨得大樓頂樓嘅宴會廳，又預言自己會經常夢見喺立法會嘅情景，仲話唔知呢個夢要發多幾多年喎。
Miriam係個重情嘅人，佢話由幼稚園起喺瑪利諾修園學校讀書讀足十三年，但到今時今日仲成日憶起喺學校上堂及課外活動嘅情景。所以Miriam感慨話，當佢一離開現時立法會大樓，相信所有回憶都不能自制地湧出，將來可能晚晚發夢都夢見立法會嘅舊事。至於最有可能夢到乜嘢，Miriam就笑笑口話發咗夢先可以同大家分享喎。
Miriam又話，最唔捨得宴會廳係因為嗰度係全棟大樓擺設最具韻味嘅地方，加上最近立法會頻頻開長命會，經常要喺宴會廳醫肚，所以印象特別難忘。