政情：公文袋黨慶煙民踩場
公民黨尋晚舉行創黨五周年籌款晚宴，連日來針對該黨嘅反對加煙稅組織再次踩場，今次仲喺場外焚燒象徵該黨嘅「公文袋」洩憤，認真大吉利是。公民黨黨魁梁家傑事後呻話，其實都唔係得佢哋一個政黨支持加煙稅，質疑對方係對人不對事喎。
講番晚宴本身，由於該黨冇特別邀請官商界名人，到場嘅絕大部分係支持者或泛民主派友好，建制派就只見地產建造界議員石禮謙（大舊石）及民建聯議員李慧琼，後者更坐咗一陣就走人。大舊石捐咗一萬元買位，但就要一邊食飯，一邊聽班公文袋成員高喊「反對地產霸權」口號，唔知食呢餐會否背脊骨落呢？
公文袋遭仇家焚燒洩憤後，梁家傑原定高歌《你還愛我嗎》籌款助興，都因為某啲技術問題甩咗轆，最後被迫改唱《浪子心聲》，真係禍不單行。晚宴最後籌到近一百七十萬元，畀人踩場燒公文袋都抵番晒喇！