政情：搶咪男隨時反被搶咪
自從《城市論壇》成功畀班憤青活化後，唔少政黨嘅第二、第三梯隊都爭相出席節目，提高曝光率之餘，亦可順道鍛煉議政能力。好似上星期日一戰成名，喺港鐵活動上衝上講台，大撒溪錢再搶走運輸及房屋局局長鄭汝樺支咪嘅社民連成員黃軒瑋，就獲邀喺今日上論壇做嘉賓，討論《衝擊高官再而三 政府管治難上難》呢個題目。不過靠搶高官咪成名嘅佢，今日隨時會畀人反過來搶咪，邊個咁大整蠱呀？
社民連近日不斷喺社交網站facebook，呼籲支持者去論壇撐「搶咪男」，短短時間已經有六十幾人聲稱會出席。不過「人怕出名豬怕肥」，有懷疑係前社民連成員嘅網友，就留言警告《城市論壇》唔係社民連地頭，話佢哋冇資格出席。仲有人講到明會狙擊黃軒瑋，話要等佢試吓畀人搶咪嘅滋味添。黃軒瑋上得台搶高官咪，當然唔係省油的燈啦，即時留言還擊，質問對方話自己唔係乜嘢名人，冇必要得到佢哋青睞喎。
搶咪男隨時畀人搶咪，呢個賣點已經夠晒勁，再睇埋其他嘉賓名單，即時嘩一聲叫咗出嚟，除咗學者城大專業學院學術統籌宋立功外，另一名嘉賓竟然係青年民建聯主席周浩鼎。眾所周知，社民連同民建聯兩個政黨，政治立場同行動方式都有天淵之別，齋睇呢個組合已經知道火藥味十足，今日應該會有好戲睇。
我哋尋日問過周浩鼎，佢話雖然知道社民連已「吹雞」叫人去撐場，不過佢覺得自己冇需要有樣學樣，唔會呼籲啲民記青年黨友去壯膽，因為上節目都只係爭取一個言論平台，毋須擔心唔夠人哋多人喎。佢又話，出席呢個節目已有半年，見過唔少講者畀人噓或者大力拍手滋擾嘅場面，不過工作人員每次都處理得好好，所以唔會太擔心。
謝志峰話毋須加強保安
節目監製謝志峰亦話，絕對唔會好似警方處理反對預算案示威咁，因為一啲網上留言就如臨大敵特別加強保安。佢強調，有市民搶高官咪，係為咗宣洩對社會嘅不滿，呢個節目嘅目的，同樣係畀人透過大氣電波發表意見、宣洩不滿，如果有人喺度搞事，即係代表嗰個人冇好好利用呢個難得嘅平台，希望大家三思，唔好將論壇變成黨爭嘅場地。如果今日「搶咪男」真係反被搶咪，最心涼嘅可能就係鄭汝樺，唔使自己郁手就有人幫佢報仇！