中環出更：仁愛新舊主席閃亮現身就職禮
仁愛堂前日喺香港洲際酒店分別舉行董事局就職禮及晚宴，前主席莊舜而同新主席蔡黃玲玲一早就到場接待嘉賓，兩人都打扮得珠光寶氣，令人眼前一亮，去年仁愛堂全年籌募近七千萬元經費，莊主席可謂功不可沒。新上場嘅蔡主席承諾會繼往開來，仲會推出全新嘅長者服務，希望帶領仁愛堂走得更高更遠。
朱繼陶指商局難搵戥腳
前日晚宴有唔少官商名人撐場，除咗主禮嘅醫院管理局行政總裁梁栢賢外，仲有行政會議成員「金刀梁」梁智鴻、前馬會行政總裁黃至剛夫婦、仁濟醫院主席李文斌夫婦、仁愛堂前主席史立德夫婦等。部分嘉賓嘅話題離唔開前商務及經濟發展局局長劉吳惠蘭（Rita）因病請辭嘅新聞。
曾經喺食環署做過Rita下屬嘅梁栢賢話，癌症同壓力及心情有關，佢自己就以做運動來減壓，但上任之後就少咗時間打網球，現時就改打壁球，同樣運動量十足。太子珠寶鐘錶執董朱繼陶前日出席就職禮時亦話，Rita個位餘下任期得番一年多，要搵人接手並唔容易，佢形容好似打牌一樣，無端端淨係叫人打兩鋪會好無癮喎！