中環出更：李少光植樹綠化男拔
尋日係周末假期，適逢天氣風和日麗，最啱同至愛去郊遊，咁啱尋日朝拔萃男書院舉行環保植樹日，好多名人校友及學生家長拖男帶女出席撐場，當中仲有個「特別嘉賓」保安局局長李少光，大家仲一齊種一棵以光哥名命嘅樹木。尋日喺大家眾志成城下，話咁易就幫男拔籌到一百五十萬元，用作支持該校嘅綠色環保項目。
光哥同一眾校友及嘉賓植過樹後，校長張灼祥、校董張宇人及譚天放等人就陪佢行遍校園，眾人談笑風生，心情靚絕。期間有五、六位校園小記者攞住紙筆追訪光哥，問佢細個時鍾意玩乜嘢，氹到嚴肅嘅光哥罕有咁露出笑容。男拔年年搵高官種樹，現時校園內唔少以高官命名嘅樹木已生得好高大。
張灼祥話，校內植物已過百種，包括價值不菲嘅羅漢松，仲有每兩星期就有收成嘅菜心、生菜，連橙樹都有，當鮮橙碩果纍纍時，都頗有城市綠洲嘅感覺㗎！
男拔係傳統直資名校，唔少政商名人都係佢哋嘅校友或家長，籌款能力自然勝人一籌。好似愛沙尼亞共和國駐港名譽領事林建康，因為其大公子林孝勇讀緊男拔小學四年級，所以都有捐錢綠化校園，尋日仲一家四口去撐場添！林孝勇同弟弟林孝政着住一式一樣嘅綠色Polo恤同牛仔褲，哥哥不時氹細佬開心，舉止得宜，好有禮貌，連男拔小學校長羅錦麗都讚林太教仔教得好。
名人避談校友梁展文
男拔校友之中，仲有近日重投新世界懷抱嘅前房屋及規劃地政局常秘梁展文，卓妮尋日問班名人校友點睇梁展文事件，點知佢哋默不作聲，好似聽唔到咁，可能真係聽唔到條問題啦！
卓妮