雖然話香港出生率低，不過公立醫院嘅產科部門照樣忙到甩轆，事關香港係內地孕婦嘅「分娩聖地」，來港產子蔚然成風。再加上中國人望子成龍，碰啱明年係十二年一遇嘅龍年，令人擔心隨時搞到產科逼爆玻璃。
講到呢度，有必要提提大家，整體公立醫院人手不足嘅問題長期未解決，所以唔好寄望非產科同事可以幫到手，專割痔瘡嘅外科醫生冇可能臨時拉伕走去婦科接生。
好嘞，既然情況咁嚴重，八間公立醫院醫護人員組成嘅「香港產科服務關注組」就提出要求，敦促醫管局正視問題，包括撤銷將軍澳醫院開設產科嘅計劃，以免攤薄資源，另外當然係限制內地孕婦來港產子啦。關注組召集人兼中大婦產科教授梁德楊預計，今年將有九萬幾個嬰兒出生，明年估計會衝破十萬大關。
面對強烈訴求，食物及衞生局局長周一嶽就話嘞，醫管局首要服務對象係本港孕婦，會研究限制內地孕婦來港產子。至於具體係用乜嘢方法限制，周局長冇提到。
嗱，唔好怪功夫茶以小人之心度君子之腹，按照周一嶽以往嘅辦事作風推測，所謂限制內地孕婦來港產子不外乎兩個方法，一：空口講白話吹水之嘛，大家千祈唔好認真；二：提高收費，加價加到嚇窒內地孕婦。
吹水呢家嘢冇必要分析，係人都知周一嶽最鍾意講廢話，否則最近唔會有不滿工時過長嘅醫生醞釀踢佢落台。如果真係提高收費，功夫茶可以話畀大家聽，冇用㗎。呢一招之前用過啦，政府向內地孕婦收取三萬九千元產子費，點知趕客不但失敗，反而人數愈來愈多，內地孕婦所佔比例由三成幾增加到接近五成。原因好明顯嘞，國內同胞有錢嘛，話之你三萬九吖，就算十萬九千七照樣豪畀你！
講到尾，又要講番整體公立醫院人手不足嘅問題長期未解決。喂，內地孕婦來港產子本來係一盤大生意，如果香港有足夠人手應付，開心都嚟唔切啦，使鬼愁眉苦臉咩。醫管局又唔去善用資源，又唔去培訓人手，卒之七個蓋冚十個樽。
計功夫茶話齋，限制內地孕婦來港產子只係斬腳趾避沙蟲嘅權宜之計，長治久安一定係培訓人手。政府又話要打造醫療中心，大力發展醫療產業，假如連接生都做唔到，孕婦送錢都唔識執，唔該周一嶽真係退位讓賢好喎，唔好阻住地球轉之餘，仲要阻住香港招財進寶吖嘛！