有些事常令人意想不到，內地孕婦竟擊沉香港「六大優勢產業之一的醫療服務」——公院婦產科醫生大叫救命。事緣內地孕婦湧港產子推高本港出生人數，預計今年本港出生嬰兒將多達九萬二千人，為四十五年來新高。
統計處數字顯示，○五年整體嬰兒出生人數五萬七千零九十八人，內地孕婦所生佔一萬九千五百三十八人；二○一○年，整體嬰兒出生人數八萬八千四百九十五人，內地孕婦所生佔四萬零六百四十八人。
有關數字反映內地孕婦來港產子逐年遞增，公院產科服務已淪陷。公院婦產科醫生眼見唔對路，急成立關注組，要求食衞局盡快補鑊，限制內地孕婦來港分娩名額，否則全港產科服務必被拖垮。
搞成今日咁嘅局面，始作俑者是誰？唔使問阿桂，就係煲呔曾嘅傑作。當年佢入主禮賓府時，一味鼓吹最少生三個，盲目容許內地孕婦來港產子，加上周一鑊打鼓趁興做推手，輕率鼓吹私營醫療體系擴展，呢幾年私院以更優厚的條件，撬走大批公院資深醫護人員，造成公院醫護人手短缺。今日惡果，煲呔曾與周一鑊均有份種！
內地孕婦來港分娩已是一種現象，周一鑊何以察覺不出？何以沒有從數字上看出危機？如今前線婦產科醫生「關注」並提醒食衞局，周一鑊會否積極檢討產科床位、人手分配、丈夫為港人的內地孕婦有優先權……這些都需要周一鑊去「斤斤計較」，唔好學鬍鬚曾吃飯大過天，要為最壞的情況作準備。