政情：張宇人拉隊撐日本菜
日本地震帶嚟嘅輻射陰霾揮之不去，本港日式食肆更加首當其衝，生意大跌，就算政府講幾多次日本進口食物安全都無用。立法會飲食界議員、自由黨張宇人（Tommy）決定今日組團去食日本菜，以行動向日本及本港食物安檢投下信心一票。不過食物及衞生局局長周一嶽就話唔得閒，唔使預佢。
Tommy話呢個諗法係由中總代表黃宜弘尋日喺立法會食飯時突然提起，佢聽到覺得唔錯，即刻坐言起行，搵咗間做日本食品入口嘅批發兼零售商做試食點，順便等大家了解吓業界苦況。Tommy仲約埋唔同黨派嘅代表食飯，實行齊心撐日本菜，不過主理本港食品安全嘅食物及衞生局就冇代表出席，Tommy話佢搵過局長周一嶽，不過佢唔得閒，但就聲稱自己成日都有食日本嘢喎！
身兼立法會食物安全及環境衞生事務委員會主席嘅Tommy仲籌劃緊，下星期去機場參觀本港嘅檢測進口食物過程，希望盡量提高透明度，回復公眾對進口食物嘅信心。