政情：邱騰華唔識讀「鈈」字
日本核危機令人擔心，但港府應對核洩漏應變依然好似食咗幾擔豬油，應該最熟悉相關議題嘅環境局局長邱騰華更連放射性物質「鈈」元素（正音：不）都讀錯，喺尋日嘅立法會會議中讀錯做「杯」，令人懷疑佢對呢種令人望而生畏嘅東西，究竟有幾咁了解。
其實「鈈」元素有兩個譯音，其一是內地譯法，即係香港電子傳媒日日用嘅，有邊讀邊就讀「不」；另一個係台灣譯法，叫做「鈽」（粵音：煲），不過睇嚟邱騰華兩個都唔識，不倫不類讀做「杯」。其實只要多啲留意新聞報道，冇理由唔知道「鈈」點讀，邱騰華閂埋對耳唔接觸外界資訊，真係唔知佢點算。
除咗邱騰華，讀錯字嘅仲有議員。民協馮檢基話日本災民好難走出地震陰霾（音：埋）時讀錯做「陰狸」；經濟動力林健鋒對災民表示深切哀悼（音：導），佢又讀錯「哀掉」，睇嚟第日議員助理要做多一步，幫議員寫埋拼音先唔使出醜嘞！