政情：李本瀅涉隱瞞輻射仲要攞威
天文台台長李本瀅幾乎可以全身而退，點知退休前發生涉嫌隱瞞核輻射襲港事件，搞到尋日要親自招開記者會澄清，仲話當年係佢第一個用測量儀發現香港有輻射添。
李本瀅喺尋日嘅天文台記者會上，搬番一九八六年切爾諾貝爾核電廠嘅陳年事迹出嚟講，佢話當年係佢第一個發現香港有輻射，佢仲揭開當年由佢撰寫嘅報告，回想起自己嗰時用個測量儀周街度，竟然度到總輻射量零點一二五貝可嘅驚人水平，銫最勁嗰陣都有零點零一五貝可，不過佢話嗰啲儀器同今日嘅無得比，所以不能作準。
李本瀅接任天文台台長唔夠一年，幾乎可以無風無浪又到退休，政府尋日公布，現任天文台助理台長岑智明將於下月十四日接替李本瀅做台長，離退休兩個禮拜，天文台涉嫌隱瞞核輻射，幾乎令佢台長生涯蒙上污點。
講起岑智明，李本瀅話二○○○年兩人拍住上搞掂機場風切變問題，原本想喺屯門加建新風切變雷達，不過就因輻射同風水問題被村民阻撓，最後要請中大專家力證無輻射，仲要政府出錢整啲「躉符」先搞掂。