中環出更：李剛即席揮毫畫作不稱心
春茗不外乎飲飲食食，不過中國藝苑研究學會會長蕭暉榮搞嘅春茗零舍有雅興，佢廣發英雄帖，邀請日本過江龍同埋城中名人嚟一場筆會，中聯辦副主任李剛、全國政協施子清等政商名人到場後，個個捲起衫袖大筆一揮，深藏不露嘅李剛擅長畫竹，不消幾分鐘，竹畫大功告成，主人家蕭暉榮如獲至寶，直嚷要裱起佢留念，李剛就話千祈咪裱！
怨紙筆有問題
李剛一入場，主持人就大爆李剛最叻畫竹，冇耐主辦單位筆墨侍候，李剛順應民意喺宣紙上寫起畫嚟，不過佢似乎唔係畫得好順手，一路畫一路話宣紙唔對路，支毛筆都唔係佢用開嗰隻，幾經波折畫完後，佢都唔係幾滿意自己嘅作品。主人家話要裱起佢，佢堅決拒絕，可能諗住獻醜不如藏拙。
成個筆會就好似武林大會，除咗李剛畫竹，日本過江龍、蒼文篆會會長尾崎蒼石寫咗一幅雙壽字畫，福建幫大佬施子清同學會會長蕭暉榮就以福同壽字互贈。成個聚會，充滿墨香。