中環出更：項明生邊食魚生 邊測輻射
日本突然引爆核危機，壞消息日日鋪天蓋地湧埋過嚟，令到原本勁受城中饕客歡迎嘅高級日式食肆瞬間水盡鵝飛，殺傷力真係好大。不過，好多城中名人冇有怕，繼續熱捧心愛嘅日本菜。Sony PlayStation香港分公司市場部總經理項明生（James），日前就特登去引入輻射測試機嘅八重菊日本料理撐場，佢一邊大啖擦魚生一邊把玩測試機，不知幾開心。中總會長蔡冠深就日日去旗下西村日本料理食嘢，一於自己做埋生招牌。輻射陰影？不過係信心問題啫！
經常度橋搞宣傳兼且扮鬼扮馬嘅James，夠晒新潮反斗，對日本地震引起嘅恐慌自然唔當一回事，仲話佢嘅日本朋友叫佢喺微博同大家講，當地人照常返工返學，唔似出面講到好似世界末日咁。一向低調嘅八重菊幕後老闆之一陳先生見James嚟幫襯，親自蒲頭招呼佢。陳老闆好坦白咁話，地震爆發初期生意唔見一半，依家直頭唔見七、八成，真係慘情，佢即刻推出連串救亡措施，添購一部輻射測試機，歡迎食客隨時檢測食材輻射量，又分散食材嘅來源，依家又度緊橋推出日式風味嘅異國風味餐，例如用日式上湯調味嘅菠菜蓉忌廉湯、美國一級靚牛炮製嘅鐵板燒等，以度過非常時期。
蔡冠深做舖頭生招牌
美食當前，但係James揸住部測試機勁玩，無論係魚生定天婦羅嘅輻射量都無所遁形，結果生帶子嘅輻射只得○點一九微希，仲少過香蕉含有嘅○點七微希，其他魚生都喺○點三微希嘅安全線之下，點子多多嘅James突然攞自己部手機測試埋一份，結果輻射量約○點二三微希，仲高過食物少少添！見佢又食又玩個樣幾搞笑。
卓妮喺另一場合見到蔡冠深，佢話近排幾乎日日喺香港酒店入面嘅西村開餐，事關逢親有朋友去幫襯，佢就落場奉陪，變身生招牌。
卓妮