易小玲真面目控訴保險公司
【專案組報道】「冇人願意行呢一步，但繼續沉默，會有公義咩？」在菲律賓人質慘劇中幸存的易小玲，花容被毀，全身冇塊好肉。明天將再次接受下顎重整手術，昨日她鼓起勇氣除下口罩，真面目示眾作出控訴。最令她氣憤是，事發後旅行社及保險公司對她不聞不問，至今一毫子賠償也收不到，「死因庭判咗都冇用，連香港都冇公義，仲點向菲律賓追討！」
明天再度重整下顎
脫下口罩的易小玲，清楚看見她的嘴呈「Ｏ」形，沒有下唇，由嘴部至下顎，有「米」字形的疤痕。她早前曾將小腿腓骨移植到下顎，但血管增生不理想，有骨枯迹象，故明天要取出枯死的腓骨，再另取一節盆骨移植代替。儘管飽受皮肉之苦，但傷痛遠遠不如心靈之痛，「依家都仲要睇精神科，日日食藥。」
她的右手食指和中指不能活動，左手拇指被切去，雙腿因多次手術，連神經線也切走，沒有知覺。醫生更判斷她有語言障礙，聽力受損。牙齒剩七顆，其中一顆亦差不多鬆脫。
最令她絕望的是，負責旅遊保險的美亞保險公司，竟然連為她判傷也拒絕。「以前做侍應、做酒店執房，都搵到萬幾元一個月，依家對前路感到好絕望！」她和兒子現時僅能依靠年老的母親照顧，生活費則由善心人士捐助的慈善基金支持。
另一生還人質陳國柱亦氣憤地說：「乜嘢叫旅遊意外保險？發生咗咁大嘅意外都冇得賠，呢啲係乜嘢保險公司！」原本從事汽車美容的他，右手受槍傷後「冇知覺，郁唔到」，無法工作，但是美亞保險認為他並非「完全傷殘」而拒絕賠償。
美亞保險早前發出的聲明指出，該公司旅遊保險保障「嚴重傷害」的範圍，包括受傷引致死亡、永久完全傷殘，即受保人因此而永久喪失所有工作能力，但易、陳的傷勢都不在該範圍。