按傳統習俗，聽日年初五係財神誕辰，接財神係大件事，最緊要提早做足工夫。不過咁，新正頭人人都想發財，趙公元帥周身唔得閒，未必個個照顧得到，所以呢，最實際就係港府快啲開倉濟貧，速速磅，唔好兩頭望。
新正頭，日日都有人上街遊行，要求當局還富於民，連尋日赤口亦唔例外。有人去政府總部請願，有人喺電台發聲，齊齊吶喊，各有訴求。
話時話，庫房水浸，財政儲備充裕，但港府對抗通脹、改善民生卻無所作為，唔怪得立法會議員拍案而起，一致聲討。有議員要求港府多啲照顧夾心階層，解決在職貧窮問題；有議員要求當局盡快發展六大產業，唔好坐而論道；有議員批評港府，本年度有幾百億盈餘，應該有長遠嘅社會福利規劃，而唔係做「留守政府」；亦有議員呼籲當局增加扶貧同老人福利嘅資源。
議員嘅批評充滿火藥味，關注團體玩得更「激」。有請願人士扮成財神，要求新一份財政預算案協助市民對抗通脹，包括派食物券、公屋免租、減免差餉及調高生果金等等。
政黨同市民訴求五花八門，其實大同小異，民怨主要因為港府漠視通脹而起。呢，有人力資源顧問話，好多公司出於營商考慮，打工仔薪金加幅未必追得上通脹。亦有團體嘅調查發現，近七成受訪者估計今年加薪幅度遠低於通脹。換言之，大部分打工仔嘅實質收入縮水，生活質素下降。
百物騰貴，經濟前景唔明朗，升斗市民入不敷支，節衣縮食過日子之餘，仲要為未來擔驚受怕。你話嘞，喺咁嘅環境之下，市民有乜理由開心，有乜理由唔怨氣沖天吖？
通脹肆虐，市民都希望港府盡快推出紓困措施，以解燃眉之急。其實，「派糖」只能起到暫時嘅紓緩作用，最多甜一甜個口，到喉唔到肺，治標唔治本。香港面臨嘅問題，歸根究柢係因為經濟發展停滯不前，經濟轉型搵唔到方向，基層職位買少見少，搞到好多打工仔要揸頸就命，毫無議價能力。講通俗啲，經濟就好似一個餅，如果唔將個餅做大，分餅嘅人愈來愈多，咁咪冇啖好食囉。
咁多年嚟，港府一事無成，獨沽金融一味，導致百業凋零，喺塘水滾塘魚之下，香港仲有幾多發展空間？呢，港府兩年前提出要發展所謂六大產業，但到今時今日都係只聞樓梯響，最多只係留咗幾幅地，話要起大學同醫院喎，可惜幾時成事根本冇人知。經濟多元化發展？吹水就得！
唉，普羅市民固然對跛腳鴨政府冇晒信心，連車公大元帥都冇眼睇，車公靈籤預測兔年本港運程，淨係一句「威人威威不是威」，就講中晒香港表面風光、外強中乾。
唔怪得連解籤師傅都話，煲呔曾高高在上，威信全無。講真，官富民窮，貧富懸殊，但港府依然罔顧民意，坐擁金山銀山仍一毛不拔，何來有威信吖。港府冇晒威信，香港危機四伏，想唔沉淪都幾難！