近來高官個個爭做硬漢子，唐唐氣吞萬里如虎狂炳「八十後」「剛愎自用，好易車毀人亡」，鬍鬚曾又透過一個青年領袖活動，吹水做領袖要「善溝通、有社會承擔及務實」。
呢啲話係「導師」都識講，呢種說話方式在修辭學裏叫「扯」！做高官唔扯得兩嘢，即係「無文」，硬梆梆不知幽默為何物。幸好鬍鬚曾鍾意抒寫網誌，不談民生多艱，只道個人生活情趣，好似舊時茶樓點心妹推出來的「熱騰騰蝦餃」。
唉！懷舊令生活更美好，自然不用顧及民意，你哋要我派糖咩？可是我憎死「派糖」呢兩個字，自然「不會因某些人大聲，就跟其意見做事」，不愧硬漢子典範！之不過佢硬得來又喜歡掉書包，唐唐上次祭出莎士比亞名句，鬍鬚曾都唔執輸，引英國已故首相邱吉爾名言：「站起來說話要有勇氣，坐低聆聽也需要勇氣。」誰知年輕人唔受落反唇相譏：「聽完之後去真心消化都需要勇氣。」引而伸之，消化完要排出體外變成春泥更護花也需要勇氣。
鬍鬚曾引邱翁名言，依老朽忖測，佢係想表達：「站起來派糖要有勇氣，坐低做守財奴也需要勇氣。」派糖令鬍鬚曾「反感」，然唔派糖令老百姓更反感，做財爺如此剛愎自用，真係好易車毀人亡。鬍鬚曾如果有啲幽默感，就不會咁唔知情識趣，佢可以舉個例話：「如果游泳可以減肥，那鯨魚怎麼肥成那德性？如果派糖可以紓困，那財爺我還需要你哋留意見唔一定留鬚？」
一於鐵着心腸，大財爺話唔派糖就唔派，夫火烈，民望而畏之！站起做硬漢，坐低數銀紙，一樂也！