環境局局長邱騰華上場以來嘅建樹大家有目共睹，尋日佢上立法會環境事務委員會，向班議員交代處理都市固體廢物政策嘅最新進度。唔知係咪因為邱騰華講嚟講去都係「三幅被」，鬧到無嘢好鬧，好多議員尋日好似患上「提問困難症」咁，唔係提問時講到「甩甩咳咳」，就好似夢遊咁唔知問緊乜。
好似民主黨甘乃威咁，尋日佢開波就話政府政策追唔上進度，有好多數據避而不談。佢提到政府一直鼓吹要起嘅焚化設施，忽然彈咗句：「我都唔知你幾時上嚟拎撥款。」政府文件早就寫明出年上半年上立法會攞撥款，甘威咁講，暴露咗無做功課。邱騰華即場踢爆佢，話希望甘議員公平啲，時間表擺咗出嚟亦都寫得好清楚啦，寸到應一應！
甘威被寸後心有不甘，第二輪發言時就批評政府所提嘅建議全部要幾年後發生，仲問可唔可以有啲提早到二○一二年前完成，暗寸到時邱騰華都唔知喺唔喺度。邱騰華都不甘示弱，話所有項目都有好緊迫嘅日程表，以前議員好多支持政策，咁咪快啲咯，反寸議員先係令政策追不上進度嘅元兇。甘威出招不成仲連累同事一齊被寸，好失威！