政情：「海底」餐廳環保無翅食

海洋公園上周就邀請咗班立法會議員到此餐廳感受呢個「奇妙的體驗」。主席盛智文尋日話，已經有兩位議員深深被海洋美景所吸引，訂咗枱為母親慶祝生日，但佢就耍手擰頭唔肯講邊兩位議員咁有孝心訂咗枱。佢笑言，餐廳選材都係根據「可持續海鮮選擇指引」設計菜式，即係好環保咁話，所以絕對無魚翅供應。不過卓妮尋日就品嘗咗有金箔灑喺上面嘅海鮮湯，畀人魚翅一樣嘅名貴感受。

講到新主題區一個個落成，盛智文就滿心歡喜如數家珍，不過，講到新購物區售賣奶粉被批評為不務正業，最後被迫唔賣，佢依然氣難平，多次強調有關批評對佢哋不公平。盛智文話賣奶粉只係方便家長應急，絕非為賺錢，佢仲話間舖咁大間，賣奶粉嘅貨架只佔極小位置，唔明白點解會畀人大做文章。