政情：蔡志明料熱錢續流港
踏入二○一一年，股市急升之後雖然稍為回落，但玩具大王蔡志明依然睇好今年股市，預測香港繼續旺財，來自四方八面嘅熱錢，會持續流入香港。
中資證券行「濱海鎰泰」尋日舉行開幕酒會，蔡志明與囝囝蔡加讚齊亮相。蔡生堪稱「樓王」，投資商廈及豪宅無往而不利，卓妮請佢為股市把脈，佢睇好今年中港經濟繼續好，港股依然暢旺。咁睇好邊類板塊股票，蔡生就賣關子話：「隻隻股票嘅特性都唔同，好難評論。」
通脹升溫，令百物騰貴，經營玩具廠嘅蔡志明都感同身受，幸好內地廠房屬自己物業，唔使捱貴租，但人工壓力，就無可避免。
嚟緊新年，蔡生將舉家遊澳洲充電，不過大千金蔡加敏懷孖仔，預產期係二月尾，呢轉旅行冇佢份嘞。加敏呢對孖Ｂ腳頭真旺，未出世已帶挈公公蔡志明生意興隆。蔡太日前出席理大慈善晚宴，透露老公成功購入中山喜來登酒店，首次進軍內地酒店市場，莫非蔡生想做埋酒店大亨？