社民連四分五裂，三名創黨立法會議員中，黃毓民同陳偉業拉隊退黨，只剩低「長毛」梁國雄獨撐現任領導層，三人從此分道揚鑣，形同陌路。陳偉業尋日上電視時公然同長毛割蓆，話已經完全唔認識呢個人，仲質疑長毛仍然維護已變質嘅社民連，從何談公義！
長毛則表示仲喺度考慮緊去留問題，但一定唔會過檔黃、陳嘅新檔口，不過強調仲當黃、陳係朋友。社民連尋晚開過會，決定全力挽留長毛，但係畀時間佢冷靜吓，唔催佢即刻決定喎。