政情：謝偉俊留守旅界遇攔路虎

直選係政壇大勢所趨，唔少功能界別議員都考慮投身直選行列，好似會計界陳茂波、廠商會林大輝同航運交通界劉健儀咁，都話過想一試身手。不過，直選路艱辛難行，無政黨選舉機器支持更加舉步維艱，最終有幾多人堅持到底，真係好難講。被指部署轉戰九龍西嘅謝偉俊，尋日就率先表態，傾向競逐連任旅遊界，佢解釋，一嚟自己都係對旅遊界議題較感興趣，二嚟做直選議員太忙，佢想留番僅餘嘅小量時間處理自己間律師樓業務喎。

傳梁志群捲土重來

唔做一件事，總係有千百個理由，但要喺選舉中勝出，無不二法門，惟靠實力。謝偉俊逐一品評潛在對手，指自由黨集業內大企業、國泰航空同中西環三股勢力，應會派旅遊業議會前主席何栢霆東山再起，而外界一直盛傳會落場競逐嘅現任旅議會主席胡兆英，唔似會蹚呢潭渾水，反而同經濟動力關係密切嘅梁志群，更大機會落場，甚至會同自由黨謀求協調，合兩大勢力出擊。

至於謝偉俊自己嘅形勢，佢話自己向以「旅遊界社民連」定位，過去兩年旅遊業發生「惡珍」事件等風波，可謂多事之秋，中小型旅行社怨聲四起，喺咁嘅氛圍下，票源應該有所增長咁話。

基於利益衝突嫌疑，謝偉俊嘅戰事分析，大家自行判斷同過濾，但有一樣佢應該無講錯，就係梁志群有意出戰旅遊界。呢位喺美國哈佛大學浸鹹水嘅港大一級榮譽畢業生，喺業界人脈唔弱，○八年一度盛傳有意參選，但最終被勸退，同年獲北京委任做廣東省政協委員。有消息指，兩年前，自由黨董耀中喺協調下勝算最大，點知中途殺出謝偉俊呢個程咬金，明年九月立法會選舉，梁志群若然捲土重來，必有一番惡鬥。

至於自由黨同梁志群係咪會合作強攻旅遊界，自由黨榮譽主席田北俊話未有所聞，梁亦非自由黨成員；經濟動力召集人林健鋒亦話，同梁志群稔熟，相信梁未有呢個打算。