中環出更：傑青低碳宴籌款辦戒毒社企
由歷屆十大傑出青年組成嘅香港傑出青年協會，尋晚舉行慈善籌款晚宴，為戒毒青少年籌款成立社企，協助佢哋為重返社會做準備。咁有意義嘅活動，梗受城中名人鼎力支持。本身都係傑青嘅富豪集團太子女羅寶文，更親自參與設計低碳菜單，大會計過當晚消耗嘅碳用量後，遲啲會喺四川種樹進行碳中和，活動嘅概念夠晒新潮環保。
晚宴星光熠熠，出席嘉賓包括保安局副局長黎棟國、前教育統籌局常秘羅范椒芬，曾任傑青協會主席嘅建築、測量及都市規劃界立法會議員劉秀成、容永祺就梗要捧自己場。
歷屆傑青亦都返嚟共襄善舉，好似菁英會常務副主席洪為民都有現身，負責主辦十大傑青選舉嘅國際青年商會都係半個主人家，所以國際青年商會香港總會會長李騰駿同做過會長嘅菁英會主席白富鴻都嚟咗，現場氣氛好熱鬧。見到咁多老友嚟撐場，現任傑青協會主席龐愛蘭（Scarlett）成晚愈忙愈開心。
Scarlett話畀卓妮聽，佢哋打算開間餐廳畀戒毒青少年多啲接觸人群，依家仲搵緊投資者同地點，目前已有兩間機構表示興趣，初步有醫院願意提供地點，所以最終有機會由醫院開始。黎棟國同羅范椒芬對呢個構思都舉腳贊成，計卓妮話，佢哋一個負責社會保安，一個曾經負責教育工作，對減少犯罪同教育下一代嘅善事，梗係贊成啦！
羅寶文度菜單
講起晚宴嘅低碳菜單，羅寶文笑稱，佢有份同廚師一齊度份餐單，由於自己食素，所以最好大家都食素支持；不過做善事無所謂喇，最緊要選用本地食材，減少運輸過程，少肉多菜，咁就夠晒低碳環保啦！
卓妮