政情：海關新樓忽冷忽熱
唔經唔覺，耗資十億興建嘅北角海關總部大樓就快入伙，不過有搬咗入去成個月嘅海關伙記話，大樓嘅空調系統仲未搞掂，有時有冷氣，有時又冇，忽冷忽熱，有手足仲因為咁樣病咗添，認真陰功。
海關發言人就回應話，雖然大樓嘅總體建築工程已經完成，但個別屋宇裝備，如空調系統仲需要調校吓，相信大樓設施全面啟用後，會再同承建商跟進咁話。
據聞，海關關長袁銘輝會喺今個禮拜尾搬入新大樓，適逢寒潮襲港，嚟緊呢個周末，氣溫跌到最低只得十度，新大樓如果無冷氣問題都唔大，但係如果空調時有時無，就真係祝佢好運喇。
既然係一座新大樓，當然係設備齊全，嗰度會有一個展覽中心，介紹吓海關歷史，又設有電腦法證所、認人室、無線電指揮中心，更重要係設有槍械庫同練靶場，咁班伙記練習射擊嗰陣，都唔使去到無雷公咁遠，方便好多。