中環出更：盛智文北上打造新蘭桂坊
「蘭桂坊之父」盛智文自八十年代起購下蘭桂坊六成多物業，將成條街打造為中產蒲點，唔少人都喺「老蘭」留下絲絲回憶。所謂「有麝自然香」，近年內地城市睇中蘭桂坊嘅國際化形象，仲主動叩門尋求合作，盛智文幾年前決定將蘭桂坊文化帶到內地，喺過程中深深體會內地人嘅辦事效率同魄力，因而為香港感到擔心，高呼「Hong Kong people need to wake up（香港人要醒覺喇）！」
盛智文近年積極同內地合作，計劃將蘭桂坊文化帶到有「大熊貓之鄉」嘅四川成都及廣州，四川蘭桂坊最快喺聖誕節前後就會開幕，但廣州珠江新城中央廣場地下商城計劃，就要等到明年中開幕，目前仲斟緊杭州漁人碼頭項目。近年好多內地城市都想升呢，不約而同希望引入蘭桂坊，增添國際化形象。盛智文透露，唔少人搵過佢合作，但佢只會揀有質素及發展潛力嘅計劃。
三年前，盛智文同內地洽商打造成都蘭桂坊時，當地已設有十九幢內地建築師設計嘅格調建築，咁有質素嘅環境，當然令佢眼前一亮啦，隨即扑錘購下大部分物業，然後擺放藝術品，搞綠化，辦露天表演，引入本港食肆，至今已成為當地熱門景點，每逢假日都逼滿遊人，食肆更加爆到要預早訂位，繼香港蘭桂坊之後創造另一神話。
盛智文最近亦成功取得位於廣州天河區心臟地帶嘅珠江新城中央廣場地下商城管理權，廣場係一個長達一點二公里嘅巨型地下商場，約有海運大廈至中港城咁長。商場有高檔品牌專區，亦有年輕人潮流娛樂區域，當然仲設有蘭桂坊啦，估計明年九月開業。呢個地下商場附近有少年宮、歌劇院及香港著名建築師嚴迅奇設計嘅「中國寶盒」廣東省博物館，絕對係廣州新亮點。
叫港人「醒覺」
面對內地蘭桂坊項目相繼開幕，盛智文感到相當自豪，但想起香港就令佢覺得好感慨，事關香港政府部門疊床架屋，政策經常議而不決，好似成都同廣州蘭桂坊喺兩、三年已經接近完成，反而香港西九文化區就十劃都未有一撇，皆因港府處於弱勢，好多嘢想做都做唔到，除非改變政治制度喎！
喺香港居住多年嘅盛智文語重心長話，香港人要「醒覺」起來喇，做事要快啲，及早計劃並採取行動，否則好快被內地爬頭！
卓妮