運動員申亞意見

趙詠賢（亞運女子壁球團體銀牌）：「我好唔明白點解會有人反對……作為一個運動員，可以喺自己國家比賽係一件好開心嘅事。」

黃蘊瑤（亞運女子單車銀牌）：「香港可以申辦亞運係對運動員好鼓舞、好正面嘅事，睇番韓國、泰國，好多亞洲地方都申辦過唔止一次亞運，香港強調係好國際化、好有活力嘅城市，我覺得係好能力去申辦亞運，證明香港係好多元化。」

陳敬然（亞運滑浪風帆金牌）：「如果能夠喺本地申辦，我相信會帶出更多金牌、更多好成績。」

歐詠芝（亞運女子壁球團體銀牌）：「如果香港有機會申辦亞運呢啲大型運動會，可以透過推廣、宣傳引起市民對體育嘅關注。」

陳浩鈴（亞運女子壁球團體銀牌）：「如果香港成功申辦亞運，對我哋將來參加二○二三年亞運嘅運動員係有好大嘅天時、地利、人和。」

陳振興（亞運男子單車金牌）：「可以辦到亞運……對下一代培養運動意識係好好。」

王史提芬（亞運男子單車金牌）：「呢個係一個好好嘅機會，唔單止提升運動員同社會，仲有設施都可以得到改善。」

趙頌熙（乒乓球運動員）：「到時候我已經廿九歲，作為一個運動員，我希望可以藉住香港作為東道主贏到主場之利，喺全港市民支持之下為香港爭光同埋拚搏。」

蔡曉慧（前游泳港隊代表）：「有啲人話點解唔將呢筆錢直接攞去推動精英運動員嘅培訓，其實我相信好多運動員，尤其是香港運動員並唔係講錢，係講心嘅，我哋最緊要有一個平台畀我哋發揮。」

蘇樺偉（殘疾運動員）：「可以為殘疾運動員喺十三年（由現在至二○二三年）裏面，更長遠地發展，社會亦更加關注殘疾運動員。」