政情：金勞詹要求任總封嘴
有「潮州怒漢」之稱嘅立法會金融服務界代表詹培忠，素來都好似同金融管理局前總裁任志剛水火不容。尋日立法會質詢金管局高層離休後再就業安排時，金勞詹乘機狂砌任志剛，仲話要限制任志剛嘅言論，搞到負責答覆嘅財政司司長曾俊華唔知點好。
質問第二波喺邊度
金勞詹大鬧任志剛喺金管局打工時經已年薪近千萬，但係離開唔夠一年就去咗三間公司做非執董；唔單止咁，佢對任志剛前排警告金融海嘯第二波非常有意見，事關任志剛嘅言論影響銀行貸款畀中小企，金勞詹直頭隔空質問任志剛：「金融海嘯第二波嚟緊？喺邊度？攞出嚟睇呀！」又要求曾俊華限制任志剛言論。
講到限制言論自由咁離題，立法會主席忍唔住開聲阻止金勞詹，金勞詹唔服，即時反駁「主席你畀司長答啦，唔好代佢揸主意」。金勞詹發揮咗一輪言論自由，曾俊華勉強回答，話睇唔到金勞詹講嘅問題，而且任志剛係有言論自由嘅。