審計署長鄧國斌尋日發表新一份審計報告，花咗三個章節怒插食環署、房屋署同警務處對員工假期管理不善。前任食環署長卓永興啱啱調職勞工處，鄧國斌都送番份「禮」畀佢，數臭之前喺佢治下嘅食環署職員，平均攞病假多過其他部門差唔多一倍。
至於房屋署雖然無食環署嘅人咁蛇王，但被揭發好多例假都係事後補領，有人竟然喺預產期後三個月先入紙申請產假，都咪話唔離譜。其實政府部門咁多人蛇王，說到底都係管理不善，部門主管責無旁貸！
