- on.cc 東方互動主頁
- 4月10日 (四)
廉政公署前日拘捕多名馬會遴選會員及會員，指有關人等涉嫌收受賄款，協助他人申請馬會會籍。作為馬主兼遴選會員嘅廠商會立法會代表林大輝話，聽到呢單新聞後都好唔開心，坦言任何制度都唔會有完美，除咗馬會要嚴格監察外，最重要係會員本身要自律，好似佢提名嘅會員就最少要具備三大條件，絕不能單憑請食飯就可以攞到佢嘅提名。
尋日喺立法會門外撞到大輝，佢話身為遴選會員，佢有七個提名權，包括兩個全費會員及五個賽馬會員，但做馬會會員話晒都係身份象徵，如果有人搵佢攞提名申請做會員，佢首先會了解申請人係咪熱愛賽馬運動，因為唔能夠淨係鍾意賭馬咁簡單；其次係申請人係咪有需要使用馬會會所內各項設施，例如閒時到會所食飯聯誼或做運動健身；最後要了解申請人係咪對社會有貢獻，當然要交得起會費啦。咁又係，全費會員入會費要廿五萬元，即使賽馬會員入會都要六萬八千元，唔係普通人玩得起㗎！
| 人人做記者 爆料方法 : | 爆料熱線： | (852) 3600 3600 | 電 郵： | news@opg.com.hk | 網上爆料 |
| 傳 真： | (852) 3600 8800 | 手機網站： | m.on.cc | ||
| SMS： | (852) 6500 6500 | MMS： | ireport@on.cc |
