政情：新界王快閃避談退位
有「新界王」之稱嘅立法會議員劉皇發考慮放棄競逐連任龍鼓灘村代表及屯門鄉事委員會主席，消息尋日傳出後，整個鄉事派大為震驚。有意挑戰發叔嘅屯門鄉委會主席地位嘅福亨村代表曾展雄話，尋日睇到本報報道後才知悉發叔唔選，事前完全未有聽聞，但佢認為發叔要親身企出嚟承認才可作實。
尋日立法會開會，由朝到晚都唔多見佢老人家。有議員話喺前廳休息室見過發叔，但好快又唔見咗人，睇嚟發叔都係採用之前處理漏報買樓風波嘅手法，暫時唔回應任何問題，免生枝節。
有接近發叔身邊嘅人透露，發叔唔選係意料中事，因為發叔咁多年都習慣自動當選，佢老人家點會參選同人爭吖！呢位身邊人又話，發叔曾經講過，自己年紀都已經有番咁上下，無謂咁辛苦做咁多嘢囉，不如集中精神做好鄉議局主席嘅工作喎。