政情：李澤楷超豪木屋內貌曝光
電盈主席李澤楷（小小超）石澳大浪灣超豪木屋內貌曝光。呢間木屋斥資逾二億元興建，起咗八年至完成，據聞小小超起咗間屋之後好少去住，只係用嚟招呼朋友，不過由讀者提供畀我哋嘅圖片可以睇到，間木屋已成為咗小小超、梁洛施同三個囝囝嘅安樂窩。
有傳豪宅早前經過悉心裝修，話口未完，尋日有讀者向我哋提供多幅相信係超豪木屋嘅內部照片，包括超豪BB房、巨型日式按摩池、花園布置和放滿溫馨照片嘅相架等。
相架嘅生活照，暴露咗小小超嘅家庭狀況。其中大相係小小超手抱BB、梁洛施彎身站其身後嘅合照，另外較細小嘅幾張相，包括BB單人照，以及與家人嘅合照，但就睇唔清楚相中BB，究竟係去年出生嘅大仔長治，定係今年七月出生嘅孖仔。
相中睇到，透過BB房前落地大窗戶，可看到屋外茂密的樹林，BB床係木做嘅，同整幢木屋相襯。另一幅則是一個豪華浴室，浴室內設有一個巨型日式按摩池，長方形設計，就算一家五口齊浸溫泉亦綽綽有餘。
