政情：李嘉誠與歐思邦共進晚餐
英國首相卡梅倫率領龐大代表團到北京訪問，行程結束，財相歐思邦尋日來港，旋風式與老友會面，包括長和系主席李嘉誠。
歐思邦中午出席咗一個午餐會，提到香港同倫敦唔係競爭對手，而係合作夥伴，相信倫敦可以參與本港嘅人民幣業務發展。下午佢喺英國領事館出席一個活動，之後佢徐徐步行經過香港公園去到長江集團中心，同長和系主席李嘉誠共進晚餐。尋晚七點十分左右，李嘉誠、長和系副主席李澤鉅同和黃董事總經理霍建寧親自去到中心嘅入口迎接歐思邦，大家見面即熱情握手、有講有笑，寒暄一番之後，一行人喺長江集團中心共進晚餐，飯敍到九時左右完畢，李超人送客時笑容滿面。
晚飯之後，歐思邦繼續佢嘅緊密行程，佢步行去長江中心斜對面嘅舊中國銀行大廈，據聞佢約咗中國會創辦人鄧永鏘爵士敍舊。
講開長和系，查實佢哋同英國好有淵源，佢哋係英國最大嘅海外投資者，喺當地投資額接近三千億元港幣，業務範圍十分廣泛，包括港口、電訊、地產、零售同基建等，僱員人數仲超過三萬名添。