政情：田少一語點醒陳裕光

話說田少上星期五晚打電話畀陳裕光，無錯係為咗「飯鐘風波」，但原意絕非做和事老，而係代自由黨主席劉健儀做信差，向陳傳達一個口訊，澄清胞弟田北辰罷食大家樂唔代表自由黨立場，因陳裕光係旅遊發展局成員，所以，呢份傳訊差事由旅發局主席田少嚟做，順便問吓大家樂打算點收科。

田少講完諗住收線，點知陳裕光主動訴心聲，指事件形勢複雜，反過嚟問田少有乜建議，一向數口精嘅田少即刻打蛇隨棍上，教陳計數，大家樂每年用成千萬元賣廣告，都係想建立良好形象，但一宗「飯鐘風波」令形象受損，賣幾多廣告都補唔番，條數應該點計，好易啫。結果喺第二日，大家樂就宣布撤銷扣飯鐘錢嘅政策。

促順民意保商譽

田少話，佢透過電話向陳裕光說之以理：「我同佢講，從營商角度講，生意做到咁大唔容易，你都要顧慮到商譽。」田少好謙，再三強調，唔敢邀功，相信佢只係眾多游說陳裕光嘅商界朋友中之一位，但點都好，見到「飯鐘風波」以呢個結局完場，佢都好開心。

陳裕光畀面田少接受勸告，身兼旅發局主席嘅田少亦禮尚往來，尋日幫同屬商界嘅陳裕光講番兩句好話，指做生意嘅人人有本難唸的經，最低工資二十八蚊實施之後，如果大家樂生意額下跌，因而加價，亦希望市民多多體諒，事關大家樂係上市公司，一旦要發盈警，其股價同銀行貸款都難免受衝擊咁話。所以話，實施最低工資，有辣有唔辣。

陳裕光近年漸為港人熟悉，○八年底金融海嘯爆發，令靠做平民快餐生意嘅陳以四十四億元身家躋身《福布斯》香港富豪榜第三十五位，想唔到呢位當年三十九歲就當上大家樂行政總裁嘅商界奇葩，心煩意亂起嚟，都要四處向人討教。不過肯聽意見，相信就係佢成功嘅主要原因。