中環出更：孫穗芳為孫中山銅像開光
中文大學豎立孫中山銅像事件拖咗兩年，終於守得雲開，銅像尋日正式由儲物室搬到逸夫書院校友徑側草地豎立，並舉行揭幕儀式。孫中山嘅孫女、孫逸仙和平教育基金會主席孫穗芳同兒子王祖耀一齊見證揭幕，喺儀式開始前，信奉佛教嘅孫穗芳行到銅像前唸唸有詞，然後喺袋中攞碌柚葉向銅像灑水開光，希望中大有正氣。
孫中山銅像「被困」兩年，孫穗芳好大量無計較，話對銅像成功豎立中大感到高興，又話銅像與將來命名嘅逸仙樓學生宿舍遙遙相對，實在相得益彰。
中大校長沈祖堯致詞時就為銅像風波補鑊美言一番，希望中大同學會受孫中山嘅精神感染，向天下為公目標邁進，並為國家富強及民主作貢獻。講到民主，問到民主女神像幾時可以喺中大豎立，沈祖堯只簡單話現時同學生傾緊，希望盡快搞掂喎！