中環出更：鄭明明自爆赴韓拉面皮

一連三日嘅亞太區美容展尋日揭幕，明明姐都以自家品牌「FAIRLADY」參展，拉埋前港姐冠軍謝寧同粉絲交流美容心得。原來謝寧廿一歲已搵明明姐紋眼線，難怪兩人咁啱傾。

月尾牛一 上海大搞

明明姐年前患濕疹困擾，扮靚都冇心機，休息一年後好番晒，正計劃去韓國拉面皮。佢話早已探路，知道韓國醫生手勢唔錯，心思思想將略嫌下垂嘅法令紋向上提升。

明明姐自爆一直有打Botox，但講到動手術就係首次。係人整容都唔想畀人知，佢就話唔介意事先張揚，因為整容無罪喎。

不過講到年齡秘密，就保持神秘，笑言年年都係廿五歲。呢個月尾，係佢牛一之喜，將喺上海舉行盛大生日派對，請埋「中國女電王」李小琳等逾百位好友一齊吹蠟燭。生日願望係乜？明明姐話，濕疹病令佢明白健康最緊要，有時間寧願享受人生，炒樓？隨緣吧。