中環出更：劉健儀揀BB禮品賀同事抱孫
立法會議員呢排輪住抱孫，繼批發及零售界議員方剛外，工聯會潘珮璆嘅乖孫都就快滿月，心思細密嘅自由黨主席劉健儀（Miriam），近日四出搜羅BB用品，諗住送份大禮賀同僚。
贈予方剛潘珮璆
卓妮早前喺中環太子大廈，撞見拎住名牌Coach手袋嘅Miriam，獨自喺專賣BB衫及童裝嘅nicholas & bears睇衫，見Miriam全神貫注睇「蛤乸衣」，仲攞上手感受吓質料夠唔夠柔軟，睇睇吓見到BB女花裙仔幾可愛，忍唔住望多兩眼，可惜揀咗十五分鐘，都係唔啱心水，惟有轉場去隔幾間舖位嘅mothercare，店內產品琳琅滿目，Miriam專攻BB被。秋風起，揀定張被實無走雞，不過睇咗五分鐘，依然冇乜心水。
正當Miriam想轉身走人，卓妮上前打招呼。Miriam笑住報喜話，方剛孫仔就快擺百日宴，潘珮璆孫仔亦快將滿月，正盤算緊送啲乜好:「小朋友大得快，送被啱用啲，不過啲貨唔啱心水，遲啲有新貨再嚟睇。」Miriam揀禮物絕不求其，好為用嘅人着想。
講番mothercare同nicholas & bears，兩個都係嬰童用品界嘅名牌。mothercare係英國嬰童市場中嘅第一品牌。至於nicholas & bears係香港地道品牌，深得名人寵愛，據聞明星張栢芝都係nicholas & bears嘅V.I.P，早前大仔Lucas出席公開活動，就以一套nicholas & bears條紋西裝配及膝五分褲，成功搶鏡。
卓妮