自從民主黨支持政改方案，一向作風偏激嘅社民連就咬住佢哋唔放，仲話要趕白鴿出泛民每個星期固定聚埋嘅「飯盒會」，民主黨真係睬你都傻，一於你有你嘈，我有我去。社民連尋日終於正式宣布退出「飯盒會」，仲話遲啲會去信協調下屆區選嘅民主動力，要求佢哋將民主黨同民協踢出協調機制。不過尋日泛民各個黨派都冇人挽留社民連，分分鐘最後又係得佢哋自己倖倖然退出，自己食自己！
一直話要同民主黨割席嘅社民連尋日終於行動，喺飯盒會上正式要求大家趕走民主黨。不過在座嘅公民黨同其他「散件」泛民議員全部唔支持，話飯盒會從來都冇「趕人」嘅制度，大家鍾意嚟就嚟，唔鍾意嚟都無辦法。眼見冇人撐，社民連副主席吳文遠就即場宣布下星期起唔再出席飯盒會，其他人亦冇挽留，大家由得佢哋走就算。
尋日嘅飯盒會亦有傾到對政改本地立法建議方案嘅睇法。雖然冇人再笑民主黨畀政府呃，不過就提出形形色色嘅修訂建議，公民黨重提分開五區選超級區會議席等等，最終都冇結論。睇嚟即使冇咗社民連，泛民想喺政改議題有一致意見都唔容易。