政情：李永達哦到林鄭黑面
煲呔曾尋日喺禮賓府宴請立法會議員，大部分立法會議員都有出席，多名問責高官都現身午宴做「陪客」，好似政務司司長唐英年、發展局局長林鄭月娥、運輸及房屋局局長鄭汝樺、保安局局長李少光、環境局局長邱騰華等都喺度。
有與會者話，煲呔曾一開始就開口叫議員唔好講啲正經嘢，甚麼關愛基金、標準工時、置安心等等全部唔好講，總之就要甜甜蜜蜜、恩恩愛愛咁話喎。今次午宴開成六枱咁多，議員嘅座位經由抽籤決定，據與煲呔曾同枱嘅議員講，今次真係純粹風花雪月，冇傾正經嘢。其實煲呔曾口中所謂嘅正經嘢，都係啲爭議性嘅嘢，即係掃興嘅嘢少講喇。
當然，對住煲呔曾就無謂掃興啫，坐其他枱嘅議員，就唔係咁話喇。聞說席間民主黨李永達不停係咁「哦」同枱嘅林鄭，因為太煩厭，搞到局長黑晒面。
澄清因唔舒服
李永達事後澄清並無其事，只係林鄭因為唔舒服先至面色唔好，唔關佢事架。不過高達又話，佢的確不斷叫局長研究規管一手樓銷售手法時唔好手軟，即使有人向阿爺投訴都唔好退縮。講到咁，唔黑面就假啦！