政情：議員高官 避談「代母」

立法會尋日開大會，咁啱見到運輸及房屋局局長鄭汝樺經過，捉住問佢有冇恭喜四叔呀？鄭汝樺嘅反應係：「咁樣都好問嘅。」跟住轉身走人。

行政會議成員、立法會議員劉江華結婚多年未有所出，但當提到「代母」時，佢講完「乜搵啲咁嘅嘢講呀？」就走返入內廳；廠商會嘅代表林大輝直情當聽唔到咁快閃走入議事廳。都係結婚多年冇所出嘅白鴿黨「高達」李永達，佢就好擔心四叔三個孫仔欠缺母愛。

已經有親密男朋友嘅議員陳淑莊就話喺單親家庭長大，話教仔女，爸爸媽媽有分工，若果日後只有一個人扮晒黑白臉，都唔知點教好。至於佢幾時結婚，佢話：「有普選先結婚。」竟然又賣政治廣告。咁睇嚟佢都係要慢慢等吓嘞。