政府原本承諾活化天水圍區內一塊地皮，有團體建議在該幅地皮開設最少一百個大牌檔。呢個建議真係唔錯，好大機會活化天水圍，更即時幫到區內居民創業。呢個建議點都好過「先租後買」，皆因焗住你選青衣，二○一四年才落成，又要畀市值租金，樓價又要以市價釐定，到時都唔知乜鬼世界！政府畀雞碎咁多，自己又要籌一筆才交到首期，算罷啦！
講真吖，如果有個檔位畀天水圍居民撚番幾味地道小菜，集合唔同嘅美食，真係可以形成一個獨特嘅食區，說不定繁華過《清明上河圖》所繪的景象。
電子動態版《清明上河圖》下月九日在香港國際機場的亞洲國際博覽館展出，大家不妨去欣賞吓，尤其係發展局局長林鄭月娥，說不定可以從中得到啟發。老朽讀趙廣超的《筆記清明上河圖》，乃知《生活雜誌》推選過去一千年來影響人類生活最深遠的一百件大事，其中第五十六件很有趣，是中國宋代的飯館小吃，連帶速食服務。
看來「民以食為天」是搞活經濟之本，飯館和小食是理所當然的需要。君不見香港即使一雞死一雞鳴，來來去去都係做番飲食居多，頂多由西餐轉壽司，或中餐轉火鍋諸如此類。
《清明上河圖》所見，相國寺附近的小甜水巷那些繁忙的南方食肆，顧客多得很。《東京夢華錄》內記載，開封夜市三更依然活躍，早市未到五更便開。史家說，在王安石着手經濟改革時，已有一百七十多個行業，在街頭隨時可吃到五、六十種小吃。政府不批地給天水圍搞美食大牌檔，超錯！