政情：環境局局長最唔環保
煲呔曾周三公布施政報告後，班問責局長今日起輪流去立法會相關事務委員會解畫，半數政策局已提交相關文件畀立法會，大部分都係十頁紙左右，少則只有三至七頁，但排隊排到下星期五去解畫嘅環境局局長邱騰華，提交嗰份文件足足有三十六頁紙，仲學施政報告咁分節分段。
有好多大計咩？錯晒！三十六頁紙全部係舊料，話會繼續做廢物源頭分類，又話鼓勵市民用節能照明，又話會逐步取代鎢絲燈膽，但推出後被擱置嘅慳電膽現金券同全城熱爆嘅擴大堆填區令廢法，就好似堆咗落堆填區咁隻字不提。
最搞笑係，當中都有提及郊野公園，話要進一步做好郊野公園附近嘅土地規管，以免郊野公園受到破壞。政府話要擴建將軍澳堆填區，就要攞郊野公園五公頃土地，咁唔係破壞郊野公園咩？文件呢段，簡直自摑嘴巴。成份文件都係充塞舊料，嘥晒啲紙。邱騰華個局主推環保，原來最唔環保嘅係佢。