政情：蘇菲梁爭櫈仔玩失蹤
立法會開鑼，各個委員會正副主席都重新執位。雖然大部分喺今屆立法會會期初段協商好晒，但比較敏感嘅政制事務委員會正、副主席要年年選過。政制委員會有三十七個委員，廿五個係建制派議員，即使尋日有三個冇到，佢哋要霸番個主席位都十拿九穩。一如所料，民建聯嘅譚耀宗成功冧莊再做主席，但經濟動力嘅梁劉柔芬（蘇菲梁）竟然爭做副主席都唔蒲頭，難怪走咗票畀泛民。
以前有建制中人提過，不如放個副主席位畀泛民做，大家一人一個平衡啲，不過正、副主席一般比其他委員早一步知道政府政策，政制事務委員會咁敏感，建制派自然唔肯放行。尋日譚耀宗以廿二票支持成功連任，點知選副主席時，被提名嘅蘇菲梁得番十八票，除咗有三個議員行開咗冇投票，有一票去咗有份角逐嘅劉慧卿嗰度。梗係喇，蘇菲梁人都唔嚟，唔撐佢都正常啫！
本身應該支持卿姐嘅民主黨張文光就差啲甩轆，選完主席出咗去收傳真，差啲令卿姐少一票支持，好彩最後趕得切返嚟投票。