政情：醫管局尋親慶20周年
醫院管理局趁下月成立二十周年，大玩尋親遊戲！局方鐵定下月十八日喺會展舉行隆重晚宴，今次係醫管局成立以嚟最大規模嘅慶祝活動，屆時會邀請歷屆主席同行政總裁出席，一齊分享醫管局二十歲生日嘅喜悅。
局方仲好有心思，設計咗一張好特別嘅請柬，當中展示由九○年至今嘅歷屆高層，當然唔少得「親生老竇」、即首任主席大Sir鍾士元，請柬仲記載咗醫管局二十年來發生嘅大事，包括東區醫院同北區醫院開幕、醫管局大樓入伙、前線醫護對抗沙士、為南亞海嘯籌款等令人難忘嘅事，足以慢慢咀嚼回味。
醫管局又會舉辦徵文比賽，邀請九○年十二月喺公立醫院出世、即係剛滿二十歲嘅年輕人參加，名副其實玩尋親遊戲，搵番醫管局班「親生仔女」分享感受。局方又為比賽設立六個獎項，冠軍可以獲得依家最潮嘅iPhone4手機，詳情可上醫管局官方網頁瀏覽，六名得獎者下月仲可以參與慶祝晚宴，與二千名嘉賓同慶生日。