政情：吳傑莊傳火炬好運打孖上
廣州亞運會嘅火炬傳遞儀式，前日喺孫中山先生故鄉中山市放光芒，八十名火炬手中，有三個係香港人，佢哋就係「霍老」霍英東長子嫡孫霍啟剛、香港青年學生動力主席吳傑莊同歌星古巨基嘞，其中吳傑莊獲安排傳第十八棒，攞正佢嘅Lucky No.「18」，佢同我哋提起，都覺得自己好Lucky。
三名港人獲揀選成為廣州亞運火炬手，自必有因。啟剛係廣州亞運香港志願者代表團團長，而本身做開拓網上商務平台生意嘅吳傑莊，除咗係香港青年學生動力主席外，亦係中山市青聯副主席；火炬儀式喺中山舉行，吳傑莊算係半個東道主。
吳傑莊講起自己有份參與火炬傳遞儀式時，難掩興奮心情，話感到好榮幸、好幸運，因為可以親身感受呢份亞洲盛事。佢話自己獲安排負責傳第十八棒，啟剛傳第六十九棒，古巨基傳第七十三棒，「18」呢個數字一向係佢嘅Lucky No.，連佢嘅手機號碼都特登揀有「18」數字嘅號碼。今次傳火炬又攞到呢個Lucky No.，都可以話係雙重幸運囉。