政情：田少畀政府打荷包?!

田少早喺七月提出商界扶貧基金概念。據悉，田少同大孖沙幾經磋商，最新構想本將基金化整為零，改由大孖沙各由旗下慈善基金低調開展扶貧項目，但全以一個旗幟徽號推出，到漸見成果就逐項公布。佢哋連徽號都諗埋，以「心」字做主體設計，象徵商界有心為社會做番啲嘢，點知施政報告宣布關愛基金大計之後，田少一切心血頓成明日黃花，事關政府抄橋搞扶貧基金，咁大塊招牌壓落嚟，你估班大孖沙最後選擇捐畀政府定係田少呢？答案不言自明啦！

揶揄政府攞晒彩

我哋尋日問田少，佢不太在乎，話政府終於肯設基金扶貧，求之不得。佢仲話，搞扶貧基金，傷神、費時同耗費人力物力；若成效不佳，更加吃力不討好，依家政府主動接火棒，除咗商界出錢，庫房亦出五十億元，理應事半功倍，佢舉腳贊成。

不過，田少話鋒一轉，不忘提醒政府，今次搞扶貧基金，千祈咪雷聲大、雨點小，佢嘅扶貧基金本打算年底落實，希望政府亦唔好拖拉，遲過呢個日子，否則對貧苦大眾唔公道嘞。田少又呼籲「關愛基金」加番「商界」兩個字喺前面，事關當初大孖沙搵佢搞扶貧基金，其中一個目的就係想做善事之餘，亦可改善形象，紓解社會上「仇商」情緒，但依家大孖沙被政府揼完心口，卻無彩可攞，呢個同樣唔公道。

至於佢嘅心血商界扶貧基金仲會唔會繼續，田少話，稍後會搵幾個大家族傾，但情理上講，大孖沙捐咗畀關愛基金後，就唔會重複又捐畀另一個基金嘞。田少留番條尾巴，但語氣間，似乎已心知商界扶貧基金概念被人打咗荷包，失而復得嘅機會已相當渺茫。